材料：
冰鮮雞 (比濃味既菜式，用新鮮雞就浪左隻雞)
浸雞汁：
生抽：老抽 5:1 ，用既份量生抽大約要1250 ml，我用九龍醬園的，因為個汁可以用好耐，用好既品牌效果好，唔會死咸。
清水 600 – 700ml
冰糖 400g ，要試味，每個人對甜既取向不同，用既豉油唔同亦有影響，可先落一半，慢慢加到合口味。
香料包：
香葉數片，
草果 2個，
八角 5-6粒，
甘草 8g，
桂皮 5g，
小茴香 5g，
沙薑 25g，
紅麴米 13g (令雞上色及有光澤)，
鹽 少量
芫茜頭 5棵，西芹 數段，薑片 5-8片(要拍)
玫瑰露 2湯匙 (每次浸雞時才加)
做法：
- 先將香料包與液體浸一晚，記住，d香料要用袋入好。
- 浸雞前將所有浸雞料煲30mins (若冇浸過，就煲多20-30 mins)。試味，若有需要，加糖或鹽調味。
- 雞解凍，洗淨抹乾，可用少量鹽搽雞身去雪味，但要將浸雞汁的鹽份相應減少。
- 雞汁煲好後，轉慢火 (雞眼水滾度) ，加玫瑰露，放入雞，雞胸或雞背向下，先浸20 mins，期間，不停用浸雞水淋上浸唔到既部份。將雞反轉再浸20mins，期間，不停用浸雞水淋上浸唔到既部份。雞胸部份或要多浸3、4分鐘，雞既大， 小亦影響所需時間，自己用針吉試下熟未。上碟後，等兩、三分鐘才切。
切忌大火煲隻雞，肉質會好鞋。
每家的爐具不同，火力不同，自己要試下。唔好滾到起泡，否則，影響雞既嫩滑口感。
浸雞汁膽返滾，隔渣，放涼後入雪櫃，每次用時加適量調味 (主要係冰糖同鹽)，若覺香味淡就再加香料返煲。保存得好，可以放好多年。